ఆస్ట్రేలియా సవాలు: కమిన్స్ పట్టుదల!
పాట్ కమిన్స్ తన తాజా వ్యాఖ్యలతో భారత్‌పై యుద్ధం ప్రకటించాడు. బోర్డర్-గవాస్కర్ ట్రోఫీని భారత్ హ్యాట్రిక్‌ కొట్టకుండా నిరోధించడమే తన లక్ష్యమని, టీమిండియా బ్యాటింగ్‌ను నిశ్శబ్దంగా ఉంచడమే తమ ప్రధాన ఆయుధమని స్పష్టం చేశాడు. షమీ లేకపోవడం భారత్‌కు గణనీయమైన నష్టమని కమిన్స్ అభిప్రాయపడ్డాడు. భారత్‌ను ప్రపంచ టెస్టు ఛాంపియన్షిప్ ఫైనల్‌కు చేరుకునేందుకు అడ్డుకోవడం తమ ప్రణాళిక అని కమిన్స్ పేర్కొన్నాడు.
“బోర్డర్-గవాస్కర్ ట్రోఫీ కోసం మేం జోరుగా ప్రాక్టీస్ చేస్తున్నాం. ఇప్పటివరకు అంతా సజావుగా సాగుతోంది. గతంలో కంటే మెరుగైన ప్రదర్శన చేస్తాం. ఈసారి ఎలాగైనా ట్రోఫీని మా చేతుల్లోకి తీసుకుంటాం. మా జట్టులో కొన్ని స్థానాలపై చర్చ సాగుతోంది. డేవిడ్ వార్నర్‌ స్థానానికి ఎవరిని ఎంచుకోవాలో ఇంకా నిర్ణయం తీసుకోవాల్సి ఉంది. కామెరూన్ గ్రీన్ లేకపోవడం మాత్రం మాకు కాస్త ఇబ్బందే” అని కమిన్స్ తెలిపాడు.
“మమ్మద్ షమీ గాయం కారణంగా దూరం కావడం భారత్‌కు పెద్ద లోటే. క్రికెట్‌లో ఇలాంటివి సర్వసాధారణం. ఒకరి స్థానంలో మరొక ప్లేయర్ సిద్ధంగా ఉంటారు. రోహిత్ శర్మ, విరాట్ కోహ్లీలు ఫామ్‌లో లేరు. కానీ వారిని ఎప్పుడూ తక్కువగా అంచనా వేయొద్దు. టీమిండియా బ్యాటింగ్‌ ఆర్డర్‌ను నిశ్శబ్దంగా ఉంచడం పైనే మేం దృష్టిసారించాం. రిషబ్ పంత్ డేంజర్‌ అని గతంలోనే చెప్పాను. మరోసారి అదే చెబుతున్నాను. ఆస్ట్రేలియా అంటే అతడు ఊగిపోతాడు. ఈసారి మాత్రం పంత్‌కు చెక్ పెడతాం. భారత ప్లేయర్స్ పేస్‌ పిచ్‌లపై బాగా ఆడుతున్నారు. పెర్త్, అడిలైడ్‌లో వారిని నిలువరిస్తామని అనుకుంటున్నా. ప్రపంచ టెస్టు ఛాంపియన్షిప్ ఫైనల్‌కు చేరుకోవడంపై ఇప్పుడే దృష్టి సారించడం లేదు” అని కమిన్స్ అన్నాడు.