ఏపీలో రాజకీయ ఉత్కంఠ: పవన్‌, చంద్రబాబు, అనిత భేటీ
తెలుగుదేశం పార్టీలో రాజకీయ వేడి పెరుగుతున్నట్లు కనిపిస్తున్నాయి. ముఖ్యమంత్రి చంద్రబాబు నాయుడు, డిప్యూటీ సీఎం పవన్‌ కల్యాణ్‌, హోం మంత్రి వంగలపూడి అనితల మధ్య భేటీ జరగడంతో రాజకీయ వర్గాల్లో ఉత్కంఠ నెలకొంది.
పవన్‌ కల్యాణ్‌ హోం మంత్రిపై చేసిన వ్యాఖ్యలు, ఢిల్లీ పర్యటన నేపథ్యంలో ఈ సమావేశం ప్రాముఖ్యత సంతరించుకుంది. సోషల్ మీడియాలో ప్రభుత్వ వ్యతిరేక పోస్టులు, పోలీసుల ప్రతిస్పందనపై పవన్‌ కల్యాణ్‌ ఇటీవల తీవ్ర అసహనం వ్యక్తం చేసిన విషయం తెలిసిందే.
“నేను హోం మంత్రి అయితే రాష్ట్రంలో పరిస్థితులు వేరేగా ఉండేవి” అని పవన్‌ కల్యాణ్‌ ఇటీవల వ్యాఖ్యానించడం వివాదాస్పదంగా మారింది. ఈ వ్యాఖ్యల నేపథ్యంలో పవన్‌ కల్యాణ్‌ హోం మంత్రి పదవిని స్వీకరించాలని కోరుతున్నారా అనే చర్చ జోరుగా సాగుతోంది.
ఈ సమావేశంలో పవన్‌ కల్యాణ్‌ చేసిన వ్యాఖ్యలపై చర్చ జరిగినట్లు తెలుస్తోంది. చంద్రబాబు నాయుడు, పవన్‌ కల్యాణ్‌, వంగలపూడి అనితల మధ్య ఏం జరిగిందో, ఈ సమావేశం రాజకీయంగా ఎలాంటి మలుపు తిప్పుతుందో తెలియాలంటే మరికొన్ని రోజులు వేచి చూడాల్సిందే.
ఇదిలా ఉండగా, బుధవారం కేబినెట్ సమావేశం తర్వాత చంద్రబాబు నాయుడు కొంతమంది మంత్రుల పనితీరుపై అసంతృప్తి వ్యక్తం చేసిన విషయం తెలిసిందే. కొందరు మంత్రుల్లో “సీరియస్‌నెస్” లేదని ఆయన ఆగ్రహం వ్యక్తం చేశారు.