నడకతో ఆరోగ్యం

ఆరోగ్యం కోసం శారీరక శ్రమ అవసరం. ప్రతిరోజూ వ్యాయామం చేయడం మంచిది. కానీ సమయం లేకపోతే, కనీసం కాలి నడక అయినా అలవాటు చేసుకోవాలి. రోజువారీ నడక శరీరానికి కావలసిన శారీరక శ్రమను అందిస్తుంది. దీని వల్ల గుండె ఆరోగ్యం మెరుగుపడుతుంది, శారీరక బరువు తగ్గుతుంది, ఎముకలు బలపడతాయి, మానసిక స్థితి మెరుగుపడుతుంది, కీళ్ళ ఆరోగ్యం మెరుగుపడుతుంది.

ప్రతిరోజూ కొన్ని అడుగులు వేయడం చాలా ముఖ్యం. కానీ, ఎన్ని అడుగులు వేయాలి? ఎక్కువ అడుగులు వేయడం హానికారకమా? ఈ ప్రశ్నలకు సమాధానం తెలుసుకుందాం.

ఆరోగ్య నిపుణులు ప్రతిరోజూ 10,000 అడుగులు వేయాలని సూచిస్తున్నారు. ఇది దాదాపు 7 నుండి 8 కిలోమీటర్ల దూరం. అయితే, ఇది వయస్సు, ఆరోగ్యం, ఫిట్‌నెస్ స్థాయి, నడక సామర్థ్యం మీద ఆధారపడి ఉంటుంది. సాధారణంగా 10,000 అడుగులు వేయడం మంచి ఆరోగ్యాన్ని కాపాడుకోవడానికి సహాయపడుతుంది.

మొదటి రోజు 10,000 అడుగులు వేయడం ద్వారా శరీరంపై ఎక్కువ ఒత్తిడి పెట్టవద్దు. ప్రారంభంలో 5,000 నుండి 7,000 అడుగులను లక్ష్యంగా పెట్టుకోండి. దశల వారీగా అడుగుల సంఖ్యను పెంచుకోండి.

వృద్ధులు 4,000 నుండి 6,000 అడుగులు వేస్తే వారి ఆరోగ్యానికి మంచిది. వారి శారీరక సామర్థ్యానికి తగ్గట్టుగా నడవాలి.

బరువు తగ్గడం కోసం లేదా ఫిట్‌గా ఉండాలనుకునే వారు 12,000 నుండి 15,000 అడుగులు వేయడానికి ప్రయత్నించాలి. ఉదయం 30 నిమిషాలు, భోజన విరామం సమయంలో లేదా రాత్రి భోజనం తర్వాత 15-30 నిమిషాలు నడవండి.