దివ్యాంగ విద్యార్థులకు పింఛన్ నేరుగా బ్యాంకు ఖాతాల్లోకి!
ఆంధ్రప్రదేశ్ ప్రభుత్వం దివ్యాంగ విద్యార్థులకు పింఛన్ విషయంలో ఒక కీలక నిర్ణయం తీసుకుంది. గురుకులాలు, హాస్టల్‌లలో చదువుతున్న దివ్యాంగ విద్యార్థులు ప్రతి నెలా తమ పింఛన్ కోసం సొంత ఊరికి వెళ్లవలసి వస్తోంది. ఇది చాలా ఇబ్బందులకు దారితీస్తోంది. కొంతమందికి ప్రయాణ ఖర్చు భారంగా మారుతోంది, మరికొంతమంది విద్యార్థులు ప్రతి నెలా కాలేజీలో సెలవు పెట్టి ఊరికి వెళ్లి రావడం ఆర్థికంగా ఇబ్బందిగా మారుతోంది.
ఈ ఇబ్బందులను దృష్టిలో ఉంచుకుని, ప్రభుత్వం దివ్యాంగ విద్యార్థుల పింఛన్‌ను నేరుగా వారి బ్యాంకు ఖాతాల్లోకి జమ చేయాలని నిర్ణయించింది. ఇకపై దివ్యాంగ విద్యార్థులు ప్రతి నెలా ఊరికి వెళ్లి పింఛన్ తీసుకునే అవసరం ఉండదు.
ఈ విధానాన్ని అమలు చేయడానికి ముందు, అధికారులు దివ్యాంగ విద్యార్థుల నుండి కొన్ని ముఖ్యమైన పత్రాలను సేకరించనున్నారు. విద్యార్థులు తమ స్టడీ సర్టిఫికేట్, బ్యాంకు పాస్‌బుక్ మొదటి పేజీ కాపీ, ఆధార్ కార్డు కాపీ, సదరం సర్టిఫికేట్, పెన్షన్ ఐడీ, స్కూల్ / కాలేజీ ఐడీ, సెల్ఫ్ ఫోటో, MPDO ధ్రువీకరిస్తూ పత్రం వంటి పత్రాలను DRDA PD కార్యాలయంలో సమర్పించాలి.
ఈ కొత్త విధానాన్ని రానున్న నెలలో అమలు చేయనున్నారు. దీని వల్ల దివ్యాంగ విద్యార్థులు తమ చదువుపై దృష్టి పెట్టడానికి సహాయపడుతుంది, అలాగే సమయం మరియు డబ్బును ఆదా చేయడానికి అవకాశం లభిస్తుంది.