రేవంత్ రెడ్డి పుట్టిన రోజుకు అరుదైన కానుక!
తెలంగాణ కాంగ్రెస్ అధ్యక్షుడు రేవంత్ రెడ్డి పుట్టిన రోజు సందర్భంగా రాష్ట్రవ్యాప్తంగా ఆయన అభిమానులు సంబురాలు చేసుకుంటున్నారు. ఈ సందర్భంగా సిరిసిల్లకు చెందిన ఓ చేనేత కార్మికుడు, రేవంత్ రెడ్డికి అరుదైన కానుకను సమర్పించి అందరినీ ఆశ్చర్యపరిచాడు. ప్రధాన మంత్రి నరేంద్ర మోదీ చేత ప్రశంసలు అందుకున్న వెల్ది హరిప్రసాద్, రేవంత్ రెడ్డి పుట్టిన రోజుకు పట్టు వస్త్రంపై ఆయన చిత్రాన్ని నేసి కానుకగా అందించారు.
“ముఖ్యమంత్రి రేవంత్ రెడ్డి పుట్టిన రోజు సందర్భంగా అరుదైన కానుకగా అందించాలని పట్టువస్త్రంపై ఆయన చిత్రం వచ్చేలా తయారు చేశా. సుమారు 5 రోజుల పాటు శ్రమించి ఈ పట్టువస్త్రాన్ని తయారు చేశా. సీఎం రేవంత్ రెడ్డిని కలిసే అవకాశం కల్పిస్తే.. ఈ అరుదైన కానుకను స్వయంగా అందజేస్తా” అని హరిప్రసాద్ తెలిపారు.
హరిప్రసాద్ చేనేత రంగంలో తన కళా నైపుణ్యాన్ని చూపిస్తూ ఎన్నో అద్భుతాలను ఆవిష్కరించారు. 2022లోనూ.. అప్పటి సీఎం కేసీఆర్‌తో పాటు కేటీఆర్ ఫొటోలతో పాటు పలు పథకాల వివరాలను తెలుపుతూ పట్టు వస్త్రాన్ని నేసి అబ్బుర పరిచాడు హరి ప్రసాద్. 2021లోనూ అగ్గిపెట్టలో పట్టే పట్టు చీర.. దబ్బనంలో ఇమిడే పట్టు చీరలు రూపొందించి హరిప్రసాద్ అందరి దృష్టిని ఆకర్షించారు. గతంలో ఎన్నో కళాఖండాలను తయారు చేసి.. ప్రముఖుల ప్రశంసలు అందుకున్నారు. జీ-20 సదస్సు లోగోను పట్టు వస్త్రంపై రూపొందించిన హరిప్రసాద్.. ప్రధాని మోదీ చేత ప్రశంసలు పొందారు. మన్ కీ బాత్ కార్యక్రమంలో మోదీ స్వయంగా.. హరిప్రసాద్ పేరును ప్రస్తావించడంతో ఆయన పేరు దేశమంతా వినిపించింది.